ფილარმონიიდან ყოვლადწმინდა სამების საკათედრო ტაძრისკენ ხვალ მრევლისა და სასულიერო პირების ლიტანიობით მსვლელობა მოეწყობა . ამის შესახებ ინფორმაცია სოციალურ ქსელში ვრცელდება.
ფილარმონიასთან შეკრებილი სასულიერო და საერო პირები ლიტანიობითა და ქალაქის ქუჩებში ნაკურთხი წყლის სხურებით დაიწყებენ მსვლელობას რუსთაველის გამზირის გავლით სამების ტაძრისკენ, სადაც 12:00 საათზე, სრულიად საქართველოს კათოლიკოს-პატრიარქი სავედრებელ პარაკლისს გადაიხდის.
ამასთან, ე.წ. ანტიდისკრიმინაციული კანონის გაუქმების მოთხოვნით 13:00 საათზე პარლამენტთან ხელმოწერები შეგროვდება. "ყველას, ვისთვისაც ძვირფასია ოჯახური სიწმინდე და მშობლები, რწმენა და ზნეობა, სამშობლო და ტრადიციები, გთხოვთ შემოგვიერთდეთ", _ ნათქვამია სოციალურ ქსელში გავრცელებულ ინფორმაციაში.
კათოლიკოს-პატრიარქმა 17 მაისი ოჯახის სიმტკიცისა და მშობლების პატივისცემის დღედ გამოაცხადა. პატრიარქმა სამღვდელოებას მისცა ლოცვა-კურთხევა, რომ 17 მაისს ნაკურთხი წყლით აკურთხონ ტაძრები, სახლები, ოჯახები და ქუჩები.
საქართველოს საპატრიარქომ კი დღეს განცხადება გაავრცელა და მორწმუნეებს მოუწოდა, ხვალისთვის დაგეგმილი მსვლელობები მხოლოდ ლოცვითი და მშვიდობიანი იყოს.