სურამში მცხოვრებ 2200 ოჯახიდან სასმელი წყალი წლების განმავლობაში არ მიეწოდებოდა 1000-მდე ოჯახს, ხოლო დარჩენილი 1200 ოჯახი სასმელ წყალს დღეგამოშვებით იღებდა.
საქართველოს რეგიონული განვითარებისა და ინფრასტრუქტურის მინისტრმა ელგუჯა ხოკრიშვილმა და გაერთიანებული წყალმომარაგების კომპანიის დირექტორმა არჩილ ცაბუტაშვილმა სურამში წყალმომარაგების დასრულებული პროექტი მოინახულეს.
დღეისათვის სურამში მოსახლეობას ხარისხიანი სასმელი წყალი 24-საათიან რეჟიმში მიეწოდება.
პროექტის ფარგლებში, სოფელ ცხრამუხას ტერიტორიაზე აშენდა ახალი სათავე ნაგებობა და სატუმბო სადგური, ნაწილობრივ რეაბილიტაცია ჩაუტარდა შიდა გამანაწილებელ ქსელს და მოეწყო ახალი მაგისტრალური ქსელი, აშენდა ორი ახალი 1000 მ3-იანი ტევადობის სამარაგო რეზერვუარი და თანამედროვე ტიპის საქლორატორო.
სასმელი წყლის ინფრასტრუქტურის გაუმჯობესების პროექტი ევროპის საინვესტიციო ბანკის დაფინანსებით განხორციელდა და მისი ღირებულება 5 მილიონამდე ლარია.