დღეს საქართველოს რეგიონული განვითარებისა და ინფრასტრუქტურის მინისტრის მოადგილემ, თეიმურაზ მურღულიამ პარლამენტის ეროვნულ ბიბლიოთეკაში საჯარო ლექცია წაიკითხა თემაზე „ეკონომიკური განვითარების თანამედროვე ღირებულებები“. ლექციას საქართველოს დიპლომატიისა და პოლიტიკის აკადემიის სტუდენტები, ექსპერტები და სხვა დაინტერესებული პირები ესწრებოდნენ.
თეიმურაზ მურღულიამ ისაუბრა საქართველოს რეგიონული განვითარებისა და ინფრასტრუქტურის სამინისტროს მიერ განხორციელებულ და მიმდინარე პროექტებზე. ასევე, ქვეყნის ეკონომიკურ განვითარებაში გზების მშენებლობის, წყალმომარაგების სისტემის გაუმჯობესების, რეგიონების ჰარმონიული განვითარებისა და სხვა მნიშვნელოვანი კომპონენტების როლზე.
„ბოლო პერიოდში, სხვადასხვა წრეებში, განსაკუთრებით გახშირდა სპეკულაციები იმასთან დაკავშირებით, თუ საით უნდა მიდიოდეს სახელმწიფო განვითარების თვალსაზრისით, რა როლს თამაშობს ამაში მთავრობა და სხვადასხვა სახელმწიფო უწყებები. ამიტომ, ძალიან მნიშვნელოვანია ის, რომ ახალგაზრდებს ჩვენი საქმიანობა კიდევ უფრო ფართოდ გავაცნოთ. მათ უნდა დაინახონ საით მიდის ქვეყანა, როგორ ვითარდება და რა მექანიზმებით ხდება განვითარების ეტაპების შეფასება. ვიმედოვნებ, რომ ისინი ამ პროცესებში აქტიურად ჩაერთვებიან. ჩვენ დღეს ახალგაზრდებს გავუზიარეთ ჩვენი გამოცდილება, რომელიც პარალელურად შევაჯერეთ ევროპულ პრაქტიკასთან“, _ განაცხადა საქართველოს რეგიონული განვითარებისა და ინფრასტრუქტურის მინისტრის მოადგილემ.
თეიმურაზ მურღულიას მოხსენების დასრულების შემდეგ, საუბარი კითხვა-პასუხის რეჟიმში გაგრძელდა.