საქართველოს ტექნიკური უნივერსიტეტის სამშენებლო ფაკულტეტის დოქტორანტ გოგუცა სულთანიშვილს, დღეს, საქართველოს რეგიონული განვითარებისა და ინფრასტრუქტურის მინისტრის მოადგილემ, თეიმურაზ მურღულიამ, საქართველოს გაერთიანებული წყალმომარაგების კომპანიის ტექნიკურმა დირექტორმა, გიორგი კობერიძემ, საქართველოს ტექნიკური უნივერსიტეტის რექტორმა, არჩილ ფრანგიშვილმა ერთწლიანი სტიპენდია გადასცეს. გოგუცა სულთანიშვილმა სტიპენდია საქართველოს გაერთიანებული წყალმომარაგების კომპანიის მიერ გამოცხადებულ კონკურსში - „წყალმომარაგების ინფრასტრუქტურის გაუმჯობესება“ - გამარჯვების შედეგად მოიპოვა.
საქართველოს გაერთიანებული წყალმომარაგების კომპანიამ, წყალმომარაგებისა და წყალარინების დარგის პოპულარიზაციის მიზნით, საქართველოს ტექნიკურ უნივერსტეტში კომპანიის სახელობის სტიპენდია დააარსა. მის მოსაპოვებლად წელს ჩატარებული კონკურსი რიგით მესამეა. წლევანდელი გამარჯვებულის თემა ქალაქ ლანჩხუთის წყალმომარაგების რეაბილიტაცია-რეკონსტრუქციას ეხებოდა. მოპოვებული სტიპენდია ტექნიკური უნივერსიტეტის დოქტორანტს სწავლის საფასურს დაუფარავს. გარდა ამისა, სტიპენდიანტს საშუალება ექნება პრაქტიკული ცოდნა მიიღოს „გაერთიანებული წყალმომარაგების კომპანიის“ ტრეინინგცეტრში, რომელიც აღჭურვილია ყველა სახის საინჟინრო საქმიანობის შესასწავლად.
კონკურსში გამარჯვებულის დაჯილდოვებას საქართველოს ტექნიკური უნივერსიტეტის სტუდენტური თვითმმართველობის წარმომადგენლები და ტექნიკური უნივერსიტეტის საინჟინრო ფაკულტეტის სტუდენტები დაესწრნენ.