საქართველოს მთავრობის ადმინისტრაციის უფროსის მოადგილემ, ნინო კობახიძემ და საქართველოს შრომის, ჯანმრთელობისა და სოციალური დაცვის მინისტრის მოადგილემ, მარიამ ჯაშმა, დღეს, საქართველოს რეგიონული განვითარებისა და ინფრასტრუქტურის სამინისტროს თანამშრომლებისთვის „სოლიდარობის ფონდის“ პრეზენტაცია გამართეს. პრეზენტაციას საქართველოს რეგიონული განვითარებისა და ინფრასტრუქტურის მინისტრი, დავით შავლიაშვილი და სამინისტროს სხვა პირველი პირები ესწრებოდნენ.
სოლიდარობის ფონდი პრემიერ-მინისტრის ინიციატივით შეიქმნა და მიზნად ისახავს საზოგადოების, კერძო სექტორისა და სახელმწიფოს თანამონაწილეობით, ინოვაციური დაფინანსების მექანიზმების ამოქმედებით, საქართველოში მცხოვრები სოციალურად დაუცველი ან კატასტროფული სოციალური დანახარჯების რისკის წინაშე მდგარი ბავშვებისა და ოჯახებისთვის ალტერნატიული (არასაბიუჯეტო) რესურსების მობილიზაციის უზრუნველყოფასა და პრიორიტეტულ სოციალურ საჭიროებებზე მიმართვას. საწყის ეტაპზე ფონდი ორიენტირებული იქნება ონკოლოგიური პაციენტების, უპირველესად კი ბავშვების ძვირადღირებული მკურნალობის ანაზღაურებაზე.
საქართველოს რეგიონული განვითარებისა და ინფრასტრუქტურის სამინისტრო ერთ-ერთია იმ სამთავრობო უწყებებს შორის, რომლის თანამშრომლებიც პირველივე დღეებში ჩაერთვნენ სოლიდარობის ფონდის დაფინანსების საქმეში. თავისი წვლილი ამ დიდ საქმეში უწყების თანამშრომლებს უანგაროდ, ნებაყოფლობით შეაქვთ.
სოლიდარობის ფონდის პროექტი საერთაშორისო გამოცდილებისა და ადგილობრივი სპეციფიკის გათვალისწინებით შემუშავდა. პროექტის ადმინისტრაციულ ხარჯებს სახელმწიფო აფინანსებს. ფინანსური გამჭვირვალობისა და თანხების მიზნობრივად განკარგვის უზრუნველსაყოფად კი სპეციალური კომისია მუშაობს.