„ეს არის უმნიშვნელოვანესი პოლიტიკური გზავნილი, მხარდამჭერი გზავნილი საქართველოს ევროპული ინტეგრაციის, საქართველოს ევროკავშირთან ასოცირების შეთანხმების იმპლემენტაციის და რათქმა უნდა, აღიარება იმისა, რომ საქართველო სწორი მიმართულებით დგამს ნაბიჯებს“-განაცხადა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა ევროკავშირის საერთაშორისო ვაჭრობის კომიტეტის თავმჯდომარის, ბერნ ლანგის, საგარეო ურთიერთობათა კომიტეტის თავმჯდომარის, ელმარ ბროკისა და ევროპის პარლამენტის ერთობლივი განცხადებაზე კომენტირებისას. განცხადების მიხედვით ევროპარლამენტარები მოვუწოდებენ წევრ სახელმწიფოებს, დაუყოვნებლივ მოახდინონ ევროკავშირისა და საქართველოს, მოლდოვასა და უკრაინას შორის ასოცირების შეთანხმების რატიფიცირება. ამასთან დაკავშირებით, მოუწოდებენ ევროკომისიას, ეფექტურად დაეხმაროს საქართველოს, მოლდოვასა და უკრაინას ასოცირების ხელშეკრულების დროებით გამოყენებაში ყველა ბერკეტით.