საქართველოს განათლებისა და მეცნიერების სამინისტროს მიერ ორგანიზებული საზეიმო კონცერტი, რომელიც ახალი სასწავლო წლის დაწყებასთან დაკავშირებით ვარდების მოედანზე გაიმართა, დაჯილდოების ცერემონიალით დაიწყო. ერთიან ეროვნულ გამოცდებში სხვადასხვა საგანში საუკეთესო შედეგების მქონე 11 სტუდენტი დაჯილდოვდა. წარმატებულ სტუდენტებს საჩუქრები სტატისტიკის ეროვნული სამსახურის ხელმძღვანელმა, კომპანია გალფის, ბორჯომის, პეტროლგაზის, ბრითიშ ამერიქან თობაქოს და ვისოლის დირექტორებმა გადასცეს, გარდა ამისა, საჩუქრები დაწესებული ჰქონდათ ლიბერთი ბანკის, დისქავერი ჯორჯიასა და თბილისის ცენტრალური საავადმყოფოს წარმომადგენლებს. კონცერტზე შეკრებილ სტუდენტებს სწავლის დაწყება განათლებისა და მეცნიერების მინისტრმა თამარ სანიკიძემ და თბილისის მერმა დავით ნარმანიამ მიულოცეს. საღამო საზეიმო კონცერტით გაგრძელდა, რომელშიც სხვადასხვა უმაღლესი სასწავლებლების სტუდენტები, ვოკალურ - ინსტრუმენტალური ანსამბლები, მოცეკვავეები და მომღერლები მონაწილეობდნენ. კონცერტი ფოიერვერკით დასრულდა.