საქართველოს განათლებისა და მეცნიერების მინისტრის პირველი მოადგილე ქეთევან ნატრიაშვილი ქალთა და გოგონათა მიმართ ძალადობის წინააღმდეგ გამართულ კონფერენციას დაესწრო. ღონისძიებას ასევე ესწრებოდნენ საქართველოს პარლამენტის თავმჯდომარე დავით უსუფაშვილი, საქართველოს პარლამენტის ვიცე-სპიკერი და პარლამენტის გენდერული თანასწორობის საბჭოს თავმჯდომარე მანანა კობახიძე, მთავრობისა და პარლამენტის წევრები, სხვადასხვა ქვეყნების ელჩები და საელჩოების წარმომადგენლები და არასამთავრობო ორგანიზაციები.
კონფერენციაზე ისაუბრეს პოლიტიკური ნების მნიშვნელობაზე ქალთა და გოგონათა მიმართ ძალადობის პრევენციის, აღკვეთისა და გენდერული თანასწორობის მიღწევისათვის. ასევე, განიხილეს საქართველოს მიერ ქალთა და გოგონათა მიმართ ძალადობისა და ოჯახში ძალადობის პრევენციისა და აღკვეთის საერთაშორისო და ეროვნულ დონეზე აღიარებული ვალდებულებების შესრულების პროგრესი და სამომავლო გეგმები.
კონფერენციის მიმდინარეობის პარალელურად, ოფიციალურად გაიხსნა ახალი გლობალური კამპანია HeforShe - კაცების სოლიდარობის მოძრაობა გენდერული თანასწორობისათვის. კამპანია მიზნად ისახავს კაცების მონაწილეობის გაზრდას ქალთა უფლებების დაცვისთვის ბრძოლაში, რათა მათ მხარი დაუჭირონ და სხვებსაც მოუწოდონ გენდერული თანასწორობის დაცვისკენ.
ღონისძიება გაიმართა გენდერული ძალადობის წინააღმდეგ 16 დღიანი გლობალური კამპანიის ფარგლებში, რომელიც მთელს მსოფლიოში 25 ნოემბერს, ქალთა მიმართ ძალადობასთან ბრძოლის საერთაშორისო დღეს დაიწყო.