■ საოცარი ადგილი - ღვთისმშობლის ტაძრად მიყვანების სახელობის მამათა მონასტერი ფიტარეთში. დღევანდელი დღესასწაული სამონასტრო კომპლექსში განსაკუთრებულად აღინიშნა. წირვა-ლოცვა სამღვდელოებასთან ერთად ბოლნელმა მთავარეპისკოპოსმა ეფრემმა აღავლინა. მამათა მონასტერში წირვა-ლოცვას ბოლნისელების გარდა, თბილისიდან ჩამოსული მრევლიც დაესწრო.
ფიტარეთის მამათა მონასტრის წინამძღვარი არქიმანდრიტი ექვთიმე შავდათუაშვილია, რომელიც გულდაწყვეტით აცხადებს, რომ უგზოობა, მდინარე ხრამზე გადასასვლელი ხიდის არარსებობა, არა მარტო მონასტერში მყოფებისთვის, ასევე მრევლისთვისაც პრობლემას წარმოადგენს.
ფიტარეთის სამონასტრო კომპლექსი ქართული ხუროთმოძღვრების ერთ-ერთი საუკეთესო ძეგლია. ის მე-13 საუკუნეში, ლაშა-გიორგის მეფობის დროს - 1213 და 1222 წლებში ქავთარ ამირეჯიბის მიერ აშენებულა. ტაძარს უწინდელი დიდებულება და ჩუქურთმები დღესაც აქვს შემორჩენილი.