სამცხე-ჯავახეთის მოსახლეობას, არასამთავრობო სექტორსა და ადგილობრივ მედიას 2 წლის საქმიანობის ანგარიში წარუდგინეს მთავრობის წევრებმა ახალციხეში გამართულ შეხვედრაზე. სამინისტროების ხელმძღვანელებმა დეტალურად ისაუბრეს მათი უწყებების მიერ რეგიონში ბოლო 2 წლის განმავლობაში განხორციელებული და დაგეგმილი პროექტების შესახებ. ადგილობრივ მოსახლეობას თავისი 1 წლის საქმიანობის ანგარიში ასევე წარუდგინა სამცხე-ჯავახეთის მხარეში სახელმწიფო რწმუნებულმა - გუბერნატორმა აკაკი მაჭუტაძემ. ცენტრალური და ადგილობრივი ხელისუფლების ანგარიშების წარდგენა ქვეყნის ყველა რეგიონში პროექტ "საქართველოს მთავრობა ღია მმართველობისთვის" ფარგლებში მიმდინარეობს.
საქართველოს რეგიონული განვითარებისა და ინფრასტრუქტურის მინისტრის მოადგილის გიორგი კობერიძეს განცხადებით, მხოლოდ 2014 წელს რეგიონებში განსახორციელებელი პროექტების ფონდის, სახელმწიფო და ადგილობრივი ბიუჯეტების დაფინანსებით განხორციელდა 600 ინფრასტრუქტურული პროექტი, რომელთა საერთო ღირებულება შეადგენს 22 412 292 ლარს.