■ კულტურული მემკვიდრეობის დაცვის ეროვნული სააგენტოს დირექტორის ნიკოლოზ ანთიძის ბრიფინგზე ინციდენტი მოხდა.
პორტალ „კვირას“ პრესკლუბში, სადაც ანთიძის ბრიფინგი იყო დანიშნული, მოულოდნელად საყდრისის გადარჩენის კომიტეტის წევრები და სტუდენტური მოძრაობა „მწვანე მუშტის“ წარმომადგენლები შეიჭრნენ. მას შემდეგ, რაც ნიკოლოზ ანთიძემ ტერიტორია დატოვა, საყდრისის მცველებმა იგი საყვირებითა და შეძახილებით გააცილეს.
„კონსტრუქციული გზით ვერ ვაგებინებთ ამ ადამიანს ვერაფერს. ჩვენ ყველაფერს გავაკეთებთ, რომ ამ ადამიანებს მათი პასუხისმგებლობა ვაგრძნობინოთ. ყველგან დავხვდებით, ყველგან გამოვაკრავთ მათ სახელებს და გვარებს, რომ მათ კაცობრიობის წინაშე ჩაიდინეს დანაშაული. ანთიძე არის კულტურული მემკვიდრეობის მნგრეველი და საყდრისის ამფეთქებელი“, - განაცხადა სტუდენტური მოძრაობა „მწვანე მუშტის“ წარმომადგენელმა სალომე ჭანტურიძემ.
საყდრისის გადარჩენის კომიტეტის წევრები აქციის გამართვას დღესაც აპირებენ. ისინი საყდრისი-ყაჩაღიანის მაღაროზე სამთო-მოპოვებითი სამუშაოების განახლებას აპროტესტებენ და ამაში კულტურის სამინისტროს და კულტურული მემკვიდრეობის დაცვის სააგენტოს ხელმძღვანელობას ადანაშაულებენ.