საქართველოს რეგიონული განვითარებისა და ინფრასტრუქტურის სამინისტროს ორწლიანი საქმიანობის ანგარიშის პრეზენტაცია სასტუმრო "ჰოლიდეი ინში" გაიმართა. ანგარიში საზოგადოებას რეგიონული განვითარებისა და ინფრასტრუქტურის მინისტრის პირველმა მოადგილემ გიორგი ამაშუკელმა გააცნო.
როგორც ამაშუკელმა დღეს გამართულ ანგარიშის პრეზენტაციაზე აღნიშნა, რეგიონული განვითარებისა და ინფრასტრუქტურის სამინისტრომ წელს ყველაზე მეტი, დაახლოებით 890 მილიონი ლარის ღირებულების ინფრასტრუქტურული პროექტები განახორციელა. კერძოდ, აშენდა და რეაბილიტაცია ჩაუტარდა საზგაო ინფრასტრუქტურას, წყალმომარაგებისა და წყალარინების სისტემას, სარწყავ არხებს, ტურისტულ, კულტურულ ძეგლებს, მოწესრიგდა ნაგავსაყრელები, განხორციელდა სტიქიის შედეგების სწრაფი ლიკვიდაცია და მასშტაბური ნაპირსამაგრი სამუშაოები. აშენდა იძულებით გადაადგილებულ პირთა საცხოვრებელი კორპუსები, ქვეყნის მასშტაბით შეზღუდული შესაძლებლობის მქონე პირებზე ადაპტირებული 82 ამბულატორია დამონტაჟდა.
აშუკელის ინფორმაციით, 2013-14 წლებში გაიხსნა ავტომაგისტრალის 55 კილომეტრი, რეაბილიტაცია ჩაუტარდა 554 კილომეტრ გზასა და 87 ხიდს. ასევე აშენდა 18 ახალი ხიდი, დაიწყო წყალმომარაგების ახალი პროექტების განხორციელება, რომელთა დასრულების შემდეგ, 300 ათასზე მეტი ადამიანი 24-საათიანი წყალმომარაგებით სარგებლობს.
რეგიონული განვითარებისა და ინფრასტრუქტურის სამინისტროს ორწლიანი ანგარიშის თანახმად, მნიშვნელოვანი ღონისძიებები გატარდა ტურისტული და კულტურული მემკვიდრეობის ძეგლების ინფრასტრუქტურის განვითარების მიმართულებითაც, გააქტიურდა სამუშაოები თეთნულდის სათახილამურო კურორტზე, დაიწყო ჭიათურის ერთ-ერთი მთავარი სატრანსპორტო საშუალების, საბაგირო გზების რეკონსტრუქცია-რეაბილიტაციის პროექტირება.
ამასთან, რეგიონებში განსახორციელებელი პროექტების ფონდისა და სოფლის მხარდამჭერი პროგრამის ფარგლებში საქართველოს ქალაქებსა და სოფლებში 14 ათასზე მეტი საშუალო და მცირე ზომის ინფრასტრუქტურული პროექტი განხორციელდა.