■ ენერგეტიკის სამინისტროსთან რაჭაში ჰესების მშენებლობის წინააღმდეგ აქცია გაიმართა.

აქციის მონაწილეებმა თურქული კომპანიის „Calik Enerji“-ს მიერ რაჭაში ჰესის შესაძლო მშენებლობა გააპროტესტეს.

„რაჭის ჩაძირვა გადაწყვიტეს. რაჭველი ვარ და საკუთარ სოფელს, საკუთარ კუთხესა და საკუთარ ვენახს ვიცავ“- განაცხადა აქციის მონაწილემ ირაკლი სარდანაშვილმა.

მისი თქმით, აღნიშნული აქციით ისინი საყდრისის საბადოზე მიმდინარე სამუშაოებსაც აპროტესტებენ და „საყდრისის მცველებს“ სოლიდარობას უცხადებენ.

აქციის მონაწილეებმა ენერგეტიკის სამინისტროსთან სიმბოლურად ყვითელი ბარათები მიიტანეს წარწერით - „მე არ ჩაგაძირინებთ რაჭას!“

ენერგეტიკის მინსიტრმა კახა კალაძემ 18 დეკემბერს სპეციალური ბრიფინგი გამართა, რომელზეც ჰიდროელექტროსადგურის პროექტის შესაძლო განხორციელებაზე ისაუბრა. მისი თქმით, ეს პროექტი არ ითვალისწინებს ადგილის დატბორვას.

ენერგეტიკის სამინისტროს ინფორმაციით, რაჭა-ლეჩხუმი-ქვემო სვანეთის რეგიონში მდინარე რიონზე, "ალპანა“ და სადმელი“ ჰესების კასკადის მშენებლობის მიზნით გამოცხადებულ ინტერესთა გამოხატვაში გამარჯვებულად თურქული კომპანია Calik Enerji გამოცხადდა.