■ პარტია „თავისუფალი დემოკრატების“ გენერალური მდივნის ალექსი პეტრიაშვილის განცხადებით, თავდაცვის სამინისტროს მაღალჩინოსნების დაკავება თავდაცვის ყოფილი მინისტრის ირაკლი ალასანიას დასაშანტაჟებლად მოხდა. ამის შესახებ მან „ტელეიმედის“ ეთერში გადაცემაში „იმედის კვირა“ განაცხადა.
„ეს ადამიანები არიან კარგად დაგეგმილი სპეცოპერაციის მსხვერპლი, რომელსაც - მძევლების აყვანა ჰქვია და ეს ირაკლი ალასანიას დასაშანტაჟებლად იყო. მის წინააღმდეგ წარმართული პოლიტიკური ბრძოლაა. „დელტაკომი“ არის ის კომპანია, რომელიც გაიგივებული იყო ვანო მერაბიშვილის შინაგან საქმეთა სამინისტროსთან და იმ დროინდელ ოპერატიულ ტექნიკურ სპეციალურ სამსახურთან და მოსმენებთან“- განაცხადა ალექსი პეტრიაშვილმა.
ე.წ. კაბელების საქმეზე დაკავებულთა ადვოკატებმა თბილისის საქალაქო სასამართლოს, მათი დაცვის ქვეშ მყოფებისთვის აღკვეთის ღონისძიების პირადი თავდებობის საფუძველზე შეცვლა და მათი გათავისუფლება მოითხოვეს. თავდაცვის სამინისტროს ყოფილ მაღალჩინოსნებს თავდებში პარლამენტის წევრები და საზოგადოებისთვის ცნობილი სახეები უდგებოდნენ, თუმცა ეს მოთხოვნა არ დაკმაყოფილდა.
ე.წ. კაბელების საქმეზე თავდაცვის სამინისტროს ხუთი მაღალჩინოსანია დაკავებული, მათ სს „სილქნეტის“ სასარგებლოდ ბიუჯეტის კუთვნილი ოთხ მილიონ ლარზე მეტის გაფლანგვას ედავებიან. ხუთივეს წინასწარი პატიმრობა აქვს შეფარდებული. სწორედ უწყების მაღალჩინოსნების დაკავებით დაიწყო ის პორცესები, რასაც მაშინდელი თავდაცვის მინისტრის, ირაკლი ალასანიას თანამდებობიდან გათავისუფლება მოჰყვა.