■ საფრანგეთში მომხდარი ტერორისტული აქტის შემდეგ დაწყებულ სოლიდარობის საყოველთაო აქციებს საქართველოც შეუერთდა.

აქცია სოციალურ ქსელში დაიგეგმა და ის საქართველოს ფრანგულ ინსტიტუტთან გაიმართა.

„ვუერთდებით სოლიდარობის გლობალურ კამპანიას #JeSuisCharlie (მე ვარ შარლი). ჩვენ ვიზიარებთ ფრანგი ხალხის მწუხარებას პარიზში, 7 იანვარს სატირულ ჟურნალ Charlie Hebdo-ზე განხორციელებული ტერორისტული თავდასხმის შედეგად მოკლული 12 ადამიანის გამო და ვგმობთ გამოხატვის თავისუფლების დათრგუნვისკენ მიმართულ ძალადობას. ჩვენ, საქართველოს მოქალაქეები, თანადგომას და სოლიდარობას ვუცხადებთ ფრანგ ხალხს“, - განაცხადეს აქციაზე.

სოლიდარობის აქციები - Je suis Charlie მსოფლიოს მსხვილ ქალაქებში იმართება.

7 იანვარს პარიზში, გამოცემა Charlie Hebdo-ს რედაქციაში 3 შეიარაღებული მამაკაცი შეიჭრა და უმისამართო სროლა ატეხა. სატირისტულ გამოცემაზე თავდასხმა ადრეც არაერთგზის მოხდა, მას შემდეგ, რაც მასში მუსლიმთა ლიდერების კარიკატურები გამოქვეყნდა.

საფრანგეთის პრეზიდენტის ფრანსუა ოლანდის გადაწყვეტილებით, საფრანგეთში სამდღიანი გლოვაა გამოცხადებული.