იტალიაში მცხოვრებმა ქართველებმა მილანის ცენტრალურ მოედანზე მოწყობილი „აფხაზური პავილიონი“ დაშალეს. როგორც ამ ფაქტის მონაწილეებმა „ინფო 9“-ს განუცხადეს, შემთხვევა გუშინ, მილანის ცენტრალურ მოედანზე მოხდა.

მათი ინფორმაციით, საახალწლო ღონისძიების ფარგლებში, მოედანზე პავილიონები იქნა მოწყობილი, ღონისძიების ორგანიზატორი იტალიის ოლიმპიური კომიტეტის მილანის ორგანიზაცია იყო.

„დასვენების დღე იყო, ამიტომაც ცენტრში უამრავი ადგილობრივი და ტურისტი იყო გამოსული. დუომოს მოედანზე მოწყობილ საახალწლო პავილიონებს შორის აღმოვაჩინეთ აფხაზეთის პავილიონი, რომელსაც „აფხაზეთის რესპუბლიკა“ ეწერა“, - ამბობს „ინფო 9“-სთან საუბარში შემთხვევის ერთ-ერთი მონაწილე დარეჯან დოკვაძე.

მისი თქმით, ქართველებმა ეს ფაქტი გააპროტესტეს. პროტესტის შემდეგ კი, იტალიის ოლიმპიური კომიტეტის წარმომადგენელმა ქართველებს განუცხადა, რომ პავილიონები ქირავდება და ვინც შესაბამის საფასურს გადაიხდის, შეუძლიათ მათთვის სასურველი ექსპოზიცია განათავსონ.

როგორც აღნიშნული ფაქტის მეორე თვითმხილველი ნანა ყუფარაძე „ინფო 9“-სთან საუბარში აღნიშნავს, პავილიონში მყოფი რამდენიმე ადამიანი ტურისტებს აფხაზეთის შესახებ დაბეჭდილ ბუკლეტებს ურიგებდა.

„ისინი არიგებდნენ ბუკლეტებსა და პუბლიკაციებს. 12 გვერდიან ბუკლეტში მოთხრობილი იყო საქართველოსგან „ჩაგრული“ აფხაზეთის შესახებ, რომელმაც ე.წ. თავისუფლება საქართველოსთან ომის შემდეგ მოიპოვა. ჩამოთვლილი იყო ქვეყნები, რომლებმაც აფხაზეთის ე.წ. დამოუკიდებლობა აღიარეს“, - ამბობს ნანა ყუფარაძე.

ქართველი თვითმხილველები აღნიშნავენ, რომ პავილიონში მდგარი ადამიანები იტალიელები იყვნენ, მათ ახლდათ ოკუპირებული აფხაზეთისა და ცხინვალის რეგიონის წარმომადგენელი იტალიაში მაურო მურჯა.