■ 2006 წელს მოკლული ზურაბ ვაზაგაშვილის ოჯახის ადვოკატების განცხადებით, საქმეზე დამოუკიდებელი გამოძიების დროს ჩატარებული ექსპერტიზის შედეგად დადგინდა, რომ ვაზაგაშვილს სასიკვდილო ჭრილობები ახლო მანძილიდან მიაყენეს.
ადვოკატებმა და დამოუკიდებელმა სამედიცინო ექსპერტმა დღეს გამართულ ბრიფინგზე მკვლელობის ადგილზე გადაღებული ფოტომასალა წარადგინა, რომელიც ამ დრომდე უცნობი იყო.
დამოუკიდებელი ექსპერტის მაია ნიკოლეიშვილის განცხადებით, ვაზაგაშვილის გარდაცვალება მარცხენა მხრიდან განხორციელებულმა ნასროლმა გამოიწვია.
„ძირითადი სროლები განხორციელდა მარჯვენა მხრიდან, რომლის შედეგადაც ხუბულოვი გარდაიცვალა. მარჯვენა მხრიდან მიყენებული დაზიანებებისგან ვაზაგაშვილი არ გარდაცვლილა. სროლა განხორციელებულია ახლო მანძილიდან. ვაზაგაშვილის სიკვდილი თავის არეში ნასროლმა ტყვიამ გამოიწვია, რომელიც მარცხენა მხრიდან განხორციელდა.
აქამდე დადგენილი იყო, რომ მრავლობითი ჭრილობების შედეგად გარდაიცვალა, თუმცა ის გარდაცვლილია თავის არეში ნასროლი ტყვიით,“ - განაცხადა მაია ნიკოლეიშვილმა.
ვაზაგაშვილის ოჯახის ადვოკატებმა მოპოვებული მასალები დღეს პროკურატურას გადასცეს.
ზურაბ ვაზაგაშვილი ალექსანდრე ხუბულოვთან ერთად, 2006 წლის მაისში ე.წ კორტებთან, შსს-ს მიერ ჩატარებული სპეცოპერაციის შედეგად მოკლეს.