■ „თავისუფალი ზონის“ ახალ ოფისთან დღეს ხმაური იყო. ოფისთან, რომელიც ორთაჭალაში მდებარეობს, „თავისუფალი თაობისა“ და „ახალგაზრდული ცენტრის“ წარმომადგენლებმა საპროტესტო აქცია გამართეს. ისინი ორგანიზაციის ლიკვიდაციას ითხოვდნენ.
აქციის მონაწილეებმა ოფისის შენობას კვერცხები დაუშინეს, რასაც ოთხი აქტივისტის დაკავება მოჰყვა. დაკავებულთა შორის „თავისუფალი თაობის“ ლიდერი ლადო სადღობელაშვილიც იყო.

აქციის მონაწილეების დაკავების პარალელურად ფიზიკური დაპირისპირება მოხდა აქციის მონაწილესა და ომარ მაღლაქველიძეს შორის, რა დროსაც მაღლაქველიძემ ერთ-ერთ ახალგაზრდას სახეში ხელი გაარტყა.

როგორც „ინფო9“-სთან საუბრისას ომარ მაღლაქველიძემ განაცხადა, რომელიც ქუჩის აქციების ცნობილი მონაწილეა (ის ამერიკის დროშით გადაადგილდება), ის მიმდებარე ტერიტორიაზე შემთხვევით მოხვდა და ახალგაზრდას პასუხი მას შემდეგ გასცა, რაც მისი მისამართით გინება გაისმა.
არასამთავრობო ორგანიზაცია „თავისუფალი ზონის“ დამფუძნებლის კობა ხაბაზის განცხადებით, ორგანიზაციის ოფისის წინ გამართული საპროტესტო აქცია ისეთივე სამარცხვინოა, როგორც არსებული ხელისუფლება.

„ერთი მხრივ, აანონსებენ საპროტესტო აქციას, ხოლო მეორე მხრივ, აქ პოლიციის მობილიზებას ახდენენ ეს კვერცხის სროლია ივანიშვილის და ღარიბაშვილის „ტიტუშკები“. ჩვენი ოფისი აგრძელებს მუშაობას და ღმერთმა არ ქნას, ჩვენს ოფისში გადმოდგან ნაბიჯი. ჩვენ ვმუშაობთ ქვეყნის კეთილდღეობისა და მომავლისთვის“, - განაცხადა კობა ხაბაზმა.
როგორც მოგვიანებით ლადო სადღობელაშვილმა „ინფო 9“-სთან საუბრისას განაცხადა, აქციაზე დაკავებული ოთხი პირი უკვე ხელწერილის საფუძველზე გაათავისუფლეს.