■ სომხეთის საელჩოსთან თბილისში სოლიდარობის აქცია გაიმართა. საელჩოს მიმდებარედ რამდენიმე არასამთავრობო ორგანიზაციის, ასევე, სომხური დიასპორის წარმომადგენლები და მოქალაქეები შეიკრიბნენ. მათ გიუმრიში მომხდარი ტრაგედიის გამო მწუხარება გამოხატეს და სომხეთის რესპუბლიკას თანაგრძნობა გამოუცხადეს.
მათ გიუმრიში მომხდარ ტრაგედიაში რუსული მხარე დაადანაშაულეს და მოითხოვეს, რომ ოჯახის 6 წევრის დახოცვაში დამნაშავე რუსი სამხედრო გასამართლების მიზნით სომხეთის მხარეს გადაეცეს.
რამდენიმე დღის წინ სომხეთში რუსულ ბაზაზე მომსახურე რიგითმა, ვალერი პერმიაკოვმა ოჯახის ექვსი წევრი, მათ შორის, ორი წლის გოგონა ავტომატით ჩაცხრილა. აღნიშნულ ფაქტს სომხეთში საპროტესტო აქციები მოჰყვა. ოჯახის მხლოდ ერთი გადარჩენილი წევრი 7 თვის ბავშვია. შემთხვევის შედეგად ისიც დაიჭრა და ექიმები ამ დრომდე მის გადარჩენას ცდილობენ.
აქციის მონაწილეები მოითხოვენ, რომ ექვსი ადამიანის მკვლელობაში ბრალდებული 18 წლის ჯარისკაცი ვალერი პერმიაკოვი სომეხ სამართალდამცავებს გადაეცეს. პერმიაკოვი კი, რომელმაც დანაშაული აღიარა, ამ დრომდე გიუმრის 102-ე ბაზაზე იმყოფება.