საქართველოს განათლებისა და მეცნიერების მინისტრის პირველი მოადგილე ქეთევან ნატრიაშვილი პროფესიულ სასწავლებელ ,,მერმისს“ ეწვია, სადაც 42 სპეციალური საგანმანთლებლო საჭიროების მქონე პირი სწავლობს. ვიზიტის მიზანი იყო სასწავლო პროცესის მიმდინარეობაზე დაკვირვება და იმ სერვისების მონახულება, რომელსაც საქართველოს განათლებისა და მეცნიერების სამინისტრო ნორვეგიის განათლებისა და კვლევის სამინისტროსთან ერთად ახორციელებს პროფესიულ სასწავლებლებში.
საქართველოს განათლებისა და მეცნიერების სამინისტრომ პროფესიული განათლების სისტემაში ინკლუზიური განათლების დანერგვა 2013 წლიდან დაიწყო და 16 პროფესიულ საგანმანათლებლო დაწესებულებაში 203 სპეციალური საგანმანათლებლო საჭიროებისა და შეზღუდული შესაძლებლობის მქონე პირი (ინტელექტუალური, სენსორული, ფიზიკური, ქცევისა და ემოციური დარღევებით) 32 სხვადასხვა საგანმანათლებლო პროგრამას ეუფლება.
საზოგადოებრივი კოლეჯი „მერმისი“ 2013 წლიდან ჩართულია პროექტში „ინკლუზიური განათლების დანერგვა საქართველოს პროფესიული განათლების და გადამზადების სისტემაში“, რომელიც უზრუნველყოფს სპეციალური საგანმანათლებლო საჭიროების მქონე პირთა ინტეგრაციას საზოგადოებაში და ზრდის მათი დასაქმების შესაძლებლობას.