საჯარო სკოლების მშენებლობისა და რეაბილიტაციის პროცესი გრძელდება. დღეს, საქართველოს განათლებისა და მეცნიერების მინისტრი თამარ სანიკიძე სამინისტროს საგანმანათლებლო ინფრასტრუქტურის განვითარების სააგენტოსა და ადგილობრივი თვითმმართველობის წარმომადგენლებთან ერთად, თეთრიწყაროს რაიონის სოფელ ხაიშის საჯარო სკოლაში განხორციელებულ სარეაბილიტაციო სამუშაოებს გაეცნო და 25 წლის იუბილესთან დაკავშირებით სკოლას 25 კომპიუტერი გადასცა.
სოფელ ხაიშში გასული საუკუნის 90-იან წლებში სვანეთიდან სტიქიით დაზარალებული 120 ეკომიგრანტი ოჯახი დასახლდა. სკოლაც მაშინ აშენდა. აქამდე ხაიშის საჯარო სკოლა არასდროს გარემონტებულა, მოშლილი იყო ყველა კომუნიკაცია, შენობაში წვიმდა. სკოლის გამო სოფელს მოსახლეობაც ტოვებდა.
ბოლო ორი წლის განმავლობაში სრულიად განახლდა სკოლის ინფრასტრუქტურა, მოხდა სასწავლო კორპუსების გადახურვა, გამოიცვალა კარ-ფანჯარა, გარემონტდა საკლასო ოთახები, გაკეთდა საკონფერენციო დარბაზი, გამოიცვალა იატაკები, კიბეები, გაკეთდა ახალი მოაჯირები, შეიღება კედლები, დამონტაჟდა თანამედროვე გათბობის სისტემა, მოწესრიგდა სველი წერტილები, გაკეთდა გარე სპორტული მოედანი. არდადეგების პერიოდში მოეწყობა შიდა სპორტული დარბაზიც. სკოლა აღიჭურვა სასწავლო და საოფისე ინვენტარით.