საქართველოს რეგიონული განვითარებისა და ინფრასტრუქტურის მინისტრი დავით შავლიაშვილი ჩინეთის ელჩს საქართველოში, იუე ბინს შეხვდა. აღნიშნული შეხვედრა გაცნობითი ხასიათის იყო.
შეხვედრაზე საუბარი მხარეებს შორის თანამშრომლობასა და სამომავლო ურთიერთობის პერსპექტივებს, ასევე ქვეყანაში მიმდინარე ინფრასტრუქტურულ პროექტებსა და ამ პროექტებში ჩინური სამშენებლო კომპანიების ჩართულობას შეეხო. დავით შავლიაშვილმა აღნიშნა, რომ კმაყოფილია ჩინურ სამშენებლო კომპანია „სინოჰიდროსთან“ თანამშრომლობით, რომელიც აქტიურად ახორციელებს თბილისი-რუსთავის ავტომაგისტრალის მშენებლობას.
მინისტრმა სამშენებლო კომპანიებთან დადებული კონტრაქტით გათვალისწინებულ ვადებში სამუშაოების ხარისხიანად შესრულებასაც გაუსვა ხაზი. ჩინეთის ელჩის იუე ბინის განცხადებით, განსაკუთრებით აღსანიშნავია ის წარმატებები, რასაც მისმა ქვეყანამ ინფრასტრუქტურის განვითარების კუთხით ბოლო პერიოდში მიაღწია. მანვე საქართველოს რეგიონული განვითარებისა და ინფრასტრუქტურის სამინისტროსთან კიდევ უფრო მჭიდრო ურთიერთობის სურვილი გამოთქვა და აღნიშნა, რომ ჩინური მხარე ნაყოფიერი ურთიერთთანამშრომლობისთვის ყველაფერს გააკეთებს.