■ ექსპრემიერის ზურაბ ჟვანიას ძმის, გოგლა ჟვანიას განცხადებით, ჟვანიას ცხედარს თავის არეში ძალიან სერიოზული დაზიანება აღენიშნებოდა.

როგორც მან ტელეკომპანია „იმედის“ გადაცემა „რეაქციაში“ განაცხადა, იმ ფირზე, რომელიც პროზექტურაში შინაგან საქმეთა სამინისტროს ოპერატორმა გადაიღო, აშკარად ჩანს, რომ მისი ძმის ცხედარს თავის ზედა არეში ძალიან სერიოზული დაზიანებები აღენიშნება.

მისი თქმით, დაზიანება ფირზე საკმაოდ კარგად ჩანს. იგი კანქვეშ არის მიყენებული.

„ტრეპანაციის დროს მას ჯერ კანი გადაუწიეს. დაზიანება ჩანს ძვალზე, ზუსტად კანის იმ ადგილას. როდესაც თავის ქალა ახადეს, დაზიანება ჩანს ტვინის გარსზეც, ზუსტად იმავე ადგილას, რაც ბადებს იმის ეჭვს, რომ ის ბლაგვი საგნით მიყენებული სერიოზული დარტყმაა“, - განაცხადა გოგლა ჟვანიამ.

მისივე თქმით, ბუნებრივია, აღნიშნულ ვერსიას ის ექსპერტები განიხილავენ, რომლებიც პროკურატურამ დაიქირავა. ჟვანიას თქმით, ექსპერტები დაზიანების ფაქტს ადასტურებენ.

ექსპრემიერი ზურაბ ჟვანია 2005 წლის 3 თებერვალს გარდაიცვალა. მისი და ქვემო ქართლის რწმუნებულის მოადგილის, რაულ უსუპოვის გვამები თბილისში, ერთ–ერთ კონსპირაციულ ბინაში იპოვეს. ოფიციალური ცნობით, ისინი გაზის გამათბობლიდან გამოჟონილი მხუთავი აირით დაიღუპნენ. ჟვანიას გარდაცვალების ოფიციალური ვერსია მისმა ოჯახმა თავიდანვე ეჭვქვეშ დააყენა.

2012 წლის ოქტომბერში მთავარმა პროკურატურამ ზურაბ ჟვანიას საქმის გამოძიება ხელახლა დაიწყო.