საქართველოს ბიზნეს ასოციაციის ორგანიზებით, ბიზნესმენებსა და მთავრობის ეკონომიკურ გუნდს შორის დისკუსია გაიმართა
■ სასტუმრო „თბილისი მარიოტში“ „საქართველოს ბიზნეს ასოციაციის“ ორგანიზებით დღეს ასოციაციის წევრი კომპანიების წარმომადგენლებსა და ხელისუფლების ეკონომიკურ გუნდს შორის შეხვედრა გაიმართა.
შეხვედრას ვიცე-პრემიერი, ეკონომიკის მინისტრი გიორგი კვირიკაშვილი, ფინანსთა მინისტრი ნოდარ ხადური, სოფლის მეურნეობის მინისტრი ოთარ დანელია, ასევე, პრემიერ-მინისტრის ეკონომიკური საბჭოს მდივანი და ბიზნესომბუდსმენი გიორგი გახარია დაესწრნენ.
შეხვედრა დიალოგის ფორმატში წარიმართა და „ბიზნეს ასოციაციის“ წევრებისთვის და ეკონომიკისთვის საჭირბოროტო საკითხებზე საუბარს დაეთმო.
მთავრობის ეკონომიკურმა გუნდმა ბიზნესმენებს მთავრობის ანტიკრიზისული სამოქმედო გეგმა წარუდგინეს, ბისნესის მხრიდან კი, მწვავე საკითხები დაისვა. მათ შორის, განხილვის ერთ-ერთი მთავარი თემა ლარის კურსი და მისი დასტაბილურების მიმართულებით, მთავრობის მიერ დაგეგმილი ნაბიჯები იყო.