■ ინტერნეტ-პორტალი "ლაიფნიუსი" ბორის ნემცოვის მკვლელობამდე რამდენიმე საათით ადრე გადაღებულ ვიდეომასალას ავრცელებს. პოლიტიკოსის სახლის ავტოსადგომზე სათვალთვალო კადრებით გადაღებულ კადრებში კარგად ჩანს, თუ როგორ გამოდიან ნემცოვი და მისი მეგობარი გოგონა სადარბაზოდან. ამის შემდეგ ნემცოვი ანა დურიცკაიას მანქანაში სვამს, თვითონ კი სადარბაზოში ბრუნდება. შემდეგ კი ის მანქანასთან ბრუნდება და დურიცკაიას დიდი ხნის განმავლობაში ელაპარაკება. საუბრის შემდეგ გოგონა მანქანით ნემცოვის მძოლს მიჰყავს, პოლიტიკოსი კი ფეხით მიდის. მოგვიანებით ისინი გუმის კაფეში ხვდებიან, 23.25-ზე კი კაფეს ტოვებენ და ვასილიევსკის დაღმართს ფეხით მიუყვებიან. სათვალთვალო კამერებით დაფიქსირებულ კადრებში ნემცოვი მდინარის მხარეს მოაჯირს მიუყვება, დურიცკაია კი კადრში არ ჩანს. მკვლელობისას ხიდზე 4 მანქანის ჩავლაა დაფიქსირებული. სროლის ხმაზე კრემლთან მდგომი პოლიციელი, რომელიც 27 თებერვლის ღამეს მორიგეობდა, შემთხვევის ადგილისკენ მირბის. მას უკან პოლიციის მანქანა მიჰყვება. "ლაიფნიუსი" ხიდზე ჩამვლელი ერთ-ერთი ავტომანქანის რეგისტრატორით დაფიქსირებულ კადრებსაც ავრცელებს, რომელიც მკვლელობიდან რამდენიმე წამშია გადაღებული. კადრებში თეთრსამოსიანი გოგონას სილუეტი და თოვლის მწმენდავი მანქანის მძღოლი ჩანს. "ლაიფნიუსის" განკარგულებაში 1 მარტს გადაღებული კადრებიც მოხვდა, რომელიც მკვლელობიდან მესამე დღეს ნემცოვის კორპუსთან არის გადაღებული. ანა დურიცკაია ნემცოვის ბინაში გამომძიებლებისა და პოლიციელების თანხლებით შედის და საკუთარი ნივთები დიდი ჩანთით გამოაქვს.