ექსპრემიერ ბიძინა ივანიშვილის მიერ დაანონსებული სატელევიზიო პროექტ „20/30“-ის პირველი გადაცემა ეთერში კვირას, 15 მარტს გავა.

გადაცემა ტელეკომპანია GDS-ის ეთერში 20:30 საათზე დაიწყება და მას საზოგადოებრივი კომუნიკაციების მართვის სპეციალისტი არჩილ გამზარდია წაიყვანს.

როგორც „ინფო 9“-ს პროექტის პროდიუსერმა, ვასილ მაღლაფერიძემ განუცხადა, პირველი გადაცემის სტუმარი ბიძინა ივანიშვილი იქნება.

მაღლაფერიძე გადაცემის თემასა და სტუმრების ვინაობას არ აკონკრეტებს, თუმცა აცხადებს, რომ გადაცემას თავისი ფორმატიდან გამომდინარე, წამყვანის გარდა, კიდევ სამი სტუმარი ეყოლება.

მისი თქმით, პროექტი ეთერში ყოველ სამუშაო დღეს გავა და მას ჟურნალისტი მაკა ცინცაძე გაუძღვება, კვირას კი, შემაჯამებელ გადაცემას საზოგადოებრივი კომუნიკაციების მართვის სპეციალისტი არჩილ გამზარდია წაიყვანს.

„გადაცემა ყოველდღიური იქნება. შესაძლოა, ბიძინა ივანიშვილი მისი სტუმარი ყოველკვირეულად იყოს, ან რამდენიმე დღეში ერთხელ მიიღოს გადაცემაში მონაწილეობა. ეს გადაცემის წამყვანის გადასაწყვეტია“, - განაცხადა ვასილ მაღლაფერიძემ.

„20/30“ საზოგადოებრივ-პოლიტიკური შინაარსის და საინფორმაციო-ანალიტიკური ხასიათის პროექტია.