■ ყოფილი პრემიერ-მინისტრის ბიძინა ივანიშვილის განცხადებით, „საზოგადოება 20/30“- ის მიზანი საქართველოში როგორც პოლიტიკური, ასევე ეკონომიკური და სოციალური მოვლენების კვალიფიციური ანალიზია.

როგორც ივანიშვილმა „ჯი დი ეს“-ის ეთერში გადაცემა „20/30“-ში განაცხადა, პროექტის საშუალებით საზოგადოებას მიმდინარე მოვლენებზე მიუკერძოებელი ანალიზი მიეწოდება.

„ჩვენ საკმაოდ დიდი ჯგუფი გვყავს. 60 კაცზე მეტი შედის „საზოგადოება 20/30“-ში.

ჩვენ შევეცდებით, რომ მოსახლეობას რაც შეიძლება მიუკერძოებელი ანალიზი და აქცენტები მივაწოდოთ, ის რაც ჩემი აზრით დღევანდელ მედიასივრცეს აკლია. დღეს „ნაციონალური მოძრაობის“ პროპაგანდისტული მანქანა მედიასივრცეში ძალიან მძაფრად მუშაობს და ბევრ სიცრუეს აწვდის მოსახლეობას. ძალიან უჭირს მოსახლეობას სწორად გაიგოს, რა ხდება რეალობაში და სწორი ანალიზი მიიღოს მიმდინარე მოვლენებზე.

2012 წლის 1 ოქტომბრის ცვლილებების შემდეგ რასაც მივაღწიეთ, ძალიან მნიშვნელოვანია საზოგადოებას კვალიფიციური ანალიზი მივაწოდოთ მიმდინარე პრობლემებზე, რომ მათ კარგად გაიგონ და გაერკვნენ პოლიტიკურ პროცესებში და დავეხმაროთ განვითარებაში იმ ჩვევების, რაც ჩვენ გვაკლია პოლიტიკურად. ჩვენ პოლიტიკური გამოცდილება გვაკლია, ამას ობიქტური მიზეზი აქვს. ჩვენ დიდი ხნის განმავლობაში ვერ ვახერხებდით საკუთარი ქვეყნის მართვას“, - განაცხადა ბიძინა ივანიშვილმა და აღნიშნა, რომ პროცესების გაანალიზებაში თავადაც მიიღებს მონაწილეობას.

მისი თქმით, „რუსთავი 2“ „ნაციონალური მოძრაობის“ პროპაგანდისტული მანქანაა, რომელიც მედიასივრცეში დომინირებს.

„ანალიტიკურ გადაცემებს სხვა ტელევიზიები ცდილობენ და მედიასივრცეში აქვთ სხვადასხვა ტიპის, თუმცა ერთი-ერთში არ ემთხვევა ჩვენ გადაცემას. ამ მხრივ ჩვენ გვაქვს პრეტენზია და განსხვავება გამოიხატება იმაში, რომ ჩვენი დიდი ჯგუფი მოახერხებს საბოლოო ანალიზის შეჯერებას და მოსახლეობისთვის მიწოდებას.

მეც ვიაქტიურებ, ყოველდღიურ რეჟიმში მივიღებ მონაწილეობას პროცესების გაანალიზებაში. „რუსთავი 2“ „ნაციონალური მოძრაობის“ პროპაგანდისტული მანქანაა, საუბედუროდ, დღეს მედიასივრცეში დომინირებს, სხვა მედიასაშუალებებიც მხარს უბამენ და მოსახლეობას რეალობის გაგება ძალიან უჭირს.