1989 წლის 9 აპრილიდან 26 წელი გავიდა. ეს არის დღე, რომელიც საქართველოს უახლოეს ისტორიაში ერთ-ერთ ყველაზე ტრაგიკულ დღედ ჩაიწერა. #9აპრილი
9 აპრილი ქართველთა უპრეცედენტო ერთიანობის დღე იყო, როდესაც ყველა ერთი მიმართულებით იბრძოდა, დანარჩენ მსოფლიოში დამოუკიდებელი სახელმწიფოს კუთვნილი ადგილისთვის. ასობით სტუდენტს, რომელმაც პროტესტის უკიდურეს ზომას, შიმშილობას მიმართა, მთავრობის სასახლის მიმდებარე ტერიტორია რამდენიმე დღე-ღამის განმავლობაში არ დაუტოვებია.
1989 წლის 9 აპრილის ტრაგიკულ და სისხლიან ღამეს, როდესაც ათასობით ადამიანი, მოითხოვდა საქართველოს დამოუკიდებლობასა და თავისუფლებას, საბჭოთა ხელისუფლებამ მიიღო გადაწყვეტილება და სასტიკად დაარბია თავისუფლების მოთხოვნით მთავრობის სასახლესთან შეკრებილი უამრავი ადამიანი.
9 აპრილს, დილის 4 საათზე, კრემლში მიღებული გადაწყვეტილებით, რუსთაველის გამზირზე საბჭოთა არმიის მძიმე ტექნიკა, შემდეგ კი ძერჟინსკის დივიზიის, დესანტისა და შინაგანი ჯარის სპეცრაზმელები გამოჩნდნენ.
„დაუკარით! რომ ძველ ხანჯალს ელდა ეცეს,“- ამ სიმღერის ჰანგებზე მწყობრად წამოსულმა საბჭოთა შენაერთმა მშვიდობიანი მომიტინგეები ალყაში მოაქცია და მესანგრეთა ბასრი ნიჩბების გამოყენებით დემონსტრანტების დარბევა დაიწყო. სადამსჯელო დანაყოფებმა მშვიდობიანი მოქალაქეების წინააღმდეგ მომწამვლელი ქიმიური გაზი "ჩერიომუხა" და "სიესი" გამოიყენეს.
იმ ღამით 21 მშვიდობიანი დემონსტრანტი დაიღუპა. სხვადასხვა სახის ტრავმებით საავადმყოფოებში 4 ათასზე მეტი ადამიანი გადაიყვანეს. მოწამვლის შედეგად, ასობით ადამიანს დღემდე აქვს ჯანმრთელობის სერიოზული პრობლემები.
ადამიანები, რომლებიც დღეს გმირები არიან, შეეწირნენ საქართველოს დამოუკიდებლობას, საკუთარი ქვეყნის თავისუფლებასა და სიყვარულს.
©INFO9.GE
#9აპრილი