პრეზიდენტის მრჩევლის გიორგი აბაშიშვილის განცხადებით, პრეზიდენტი გიორგი მარგველაშვილი მზადაა, ექსპრემიერ ბიძინა ივანიშვილს საკუთარი საცხოვრებელი ფართები მედიის თანდასწრებით დაათვალიერებინოს.
ამის შესახებ აბაშიშვილმა ჟურნალისტებს პრეზიდენტის რეზიდენციასთან დაკავშირებით განვითარებულ მოვლენების კომენტირებისას განუცხადა.
„მას შემდეგ, რაც ბიძინა ივანიშვილის მიერ გამოითქვა მოსაზრება პრეზიდენტის ფუფნებისადმი მიდრეკილებასთან დაკავშირებით, მე ვესაუბრე პრეზიდენტს და ის მზადაა, უმასპინძლოს ბიძინა ივანიშვილს და „2030“-ის ანალიტიკოსებს საკუთარი საცხოვრებელი ფართების დეტალურად დასათვალირებლად, ყველა მედიასაშუალების თანდასწრებით, ნებისმიერ დროს“, - განაცხადა გიორგი აბაშიშვილმა.
ამასთან, მისივე თქმით, შესაძლებელია, ავლაბრის რეზიდენციის დათვალიერებაც, მიუხედავად იმისა, რომ ეს პრეზიდენტის სამუშაო ადგილია და არა საცხოვრებელი.
ხელისუფლების წარმომადგენლები პრეზიდენტ მარგველაშვილს მოუწოდებენ, ავლაბრის რეზიდენციიდან ათონელის ქუჩაზე გარემონტებულ შენობაში გადავიდეს. ამისკენ მარგველაშვილს ექსპრემიერმა ბიძინა ივანიშვილმაც მოუწოდა.