ბიძინა ივანიშვილთან ასოცირებულ კომპანიებში მომუშავე პირები ან მათი ოჯახის წევრები საჯარო სამსახურის წამყვან თანამდებობებზე დაინიშნენ ან აირჩნენ - ამის შესახებ საუბარია საერთაშორისო გამჭვირვალობა საქართველოს კვლევაში, რომელიც დღეს გამოქვეყნდა. კვლევის თანამდებობის პირთა ქონებრივ დეკლარაციებს ეყრდნობა. ორგანიზაციის ინფორმაციით, სულ მცირე 38 თანამდებობის პირი წარსულში მუშაობდა ბიძინა ივანიშვილთან დაკავშირებულ რომელიმე კომპანიაში, მათ შორის 6 პოლიტიკური თანამდებობის პირია. მათ შორის პრემიერი ირაკლი ღარიბაშვილი, რომელიც ფონდ „ქართუს“ თავმჯდომარე იყო. ასევე ინფრასტრუქტურის ახალი მინისტრი ნოდარ ჯავახიშვილი - ბანკი ქართუს და ქართუ ჯგუფის ყოფილი გენერალური დირექტორი; ეკონომიკის მინისტრი გიორგი კვირიკაშვილი - ასევე ბანკი „ქართუს“ ყოფილი გენერალური დირექტორი;
ჯანდაცვის მინისტრი დავით სერგეენკო მინისტრობამდე საჩხერის სამედიცინო ცენტრს ხელმძღვანელობდა, რომელსაც ბიძინა ივანიშვილი აფინანსებდა. მოქმედი შინაგან საქმეთა მინისტრი ვახტანგ გომელაური კი წლების განმავლობაში ბიძინა ივანიშვილის დაცვის სამსახურში მუშაობდა.
კვლევის შესახებ განცხადებები გააკეთეს საქართველოს პარლამენტის წევრებმა. საპარლამენტო უმრავლესობის წევრი ანი მიროტაძე ვერაფერს ხედავს საოცარს იმაში, რომ ხელისუფლებაში მოსულმა გუნდმა დაასაქმოს კვალიფიციური კადრები, ვისზეც მას აქვს შესაბამისი წარმოდგენა და გარანტიები.