ძლიერი მიწისძვრის შედეგად ნეპალში 100-ზე მეტი ადამიანი დაიღუპა.
7,9 მაგნიტუდის სიმძლავრის მიწისძვრის ეპიცენტრი დედაქალაქ კატმანდუდან 77 კილომეტრში იყო, რამაც ბოლო 80 წლის განმავლობაში ყველაზე ძლიერი ნგრევა გამოიწვია.

კატმანდუს მთავარი ჰოსპიტალი ათობით დაშავებულს ღებულობს, დაღუპულების შესახებ ინფორმაცია ჯერჯერობით დაუზუსტებელია.

როგორც „ბი ბი სი“ იტყობინება, ათობით ადამიანია მოყოლილი კატმანდუს უძველესი მეცხრამეტე საუკუნეში აგებული კოშკის ნანგრევების ქვეშ. ასევე უცნობია, რამდენი ადამიანი იმყოფებოდა კოშკში, რადგან ეს კოშკი არის კატმანდუს ერთ-ერთი ტურისტული ღირსშესანიშნაობა. იგი იუნესკოს მსოფლიო მემკვიდრეობის სიაშია შესული.
ასევე ვრცელდება ინფორმაცია, რომ მიწისძვრის შედეგად დაინგრა ბევრი შენობა, დაიხურა კატმანდუს აეროპორტი, შეწვეტილია სატრანსპორტო კავშირი. მიწისძვრის შედეგად ევერესტიდან ზვავები დაიძრა.

როგორც ევროპა-ხმელთაშუაზღვის რეგიონის სეისმოლოგიური ცენტრი იტყობინება, მიწისძვრის კერა 31 კილომეტრის სიღრმეში მდებარეობს. მიწისძვრის რყევები იგრძნობოდა ინდოეთის დედაქალაქ დელიში, ასევე ნეპალთან მოსაზღვრე ინდოეთის სხვა ქალაქებში.