მთავრობა მუდმივად საჭიროებს განახლებას და ამაში სასკანდალო არაფერია - ასე საქართველოს პრემიერმინისტრი ელგუჯა ხოკრიშვილის გარემოს დაცვის მინისტრის პოსტიდან გადადგომას გამოეხმაურა. ირაკლი ღარიბაშვილი ჟურნალისტებს მოუწოდებს, აჟიოტაჟი ხელოვნურად არ ატეხონ, რადგან ყველაფერი ძალიან კარგად არის. ყოფილ მმართველ გუნდში კი საკადრო ცვლილებებს ბიძინა ივანიშვილს უკავშირებენ. საპარლამენტო უმრავლესობისთვის ხოკრიშვილის გადადგომა მოულოდნელი აღმოჩნდა. უმრავლესობისგან განსხვავებით, თავისუფალი დემოკრატების წევრები მინისტრების გადადგომის ტენდენციის გაგრძელებას ელოდებიან. ელგუჯა ხოკრიშვილის გადადგომას მინისტრთა კაბინეტის წევრებიც გამოეხმაურნენ. თეა წულუკიანის თქმით, თუ მთავრობიდან კიდევ ერთი მინისტრი გათავისუფლდება, ნდობის გამოცხდების საკითხი დღის წესრიგში დადგება, მაგრამ ამაში სანერვიულო არაფერია.