სასტუმრო „თბილისი მარიოტში“ „მოქალაქის“ და „საზოგადოება 2030“-ის ორგანიზებით ეკონომიკური კონფერენცია - „საქართველოს ეკონომიკა - მიღწევები და გამოწვევები“ გაიმართა.
კონფერენცია ორგანიზაციების - „მოქალაქე“ და „საზოგადოება 2030“-ის დამფუძნებელმა ბიძინა ივანიშვილმა გახსნა.
როგორც ბიძინა ივანიშვილმა კონფერენციის გახსნისას განაცხადა, დღეს ქვეყნის მთავარი გამოწვევა ეკონომიკაა, რაც ხშირად პოლიტიკური სპეკულაციების საგანი ხდება.
ივანიშვილი მიიჩნევს, რომ პერმანენტულად უნდა გაიმართოს მსგავსი ფორუმები, რომელშიც მონაწილეობას მიიღებენ ბიზნესისა და სახელმწიფო სტრუქტურების, ასევე, კვალიფიციური ექსპერტები და დარგის სპეციალისტები, ეს კი პროფესიონალური, არაპოლიტიზებული დისკუსიის შესაძლებლობას შექმნის.
„დემოკატიული ქვეყნების ძირითადი ღირებულებები საქართველოშიც ძალიან დიდი ნაწილი კარგ დონეზეა და შეიძლება, შესადარიც იყოს. ძალიან ბევრი განვითარებული დემოკრატიული ქვეყნების ინსტიტუციური ღირებულებები საქართველოში შესადარია მათთან. ამ დროს ეკონომიკა დაახლოებით 10-ჯერ ჩამორჩება განვითარებულ ევროპულ ქვეყნებს და ამერიკის შეერთებულ შტატებს. გამოწვევა გვაქვს სპეციალური. ვერ ვიხსენებ ქვეყნას საქართველოს მსაგვსს, რომ ასეთი ეკონომიკის მქონე ქვეყანას მსგავსი დემორკატიული ღირებულებების დაფუძნება შეძლებოდეს. ამას ძალიან დიდი მნიშვნელობა აქვს“,- აღნიშნა ივანიშვილმა.
მისივე თქმით, ახალი ხელისუფლების მოსვლის შემდეგ, ძირითადი უკვე გაკეთებულია და ამას დახვეწა და შენარჩუნება სჭირდება.
კონფერენციაში მონაწილეობა საექსპერტო წრეების, არასამთავრობო ორგანიზაციების, საინვესტიციო ფონდების და უნივერსიტეტების 70-მდე წარმომადგენელმა მიიღო.
კონფერენციაზე განიხილეს ისეთი საკითხები, როგორიცაა ეროვნული ვალუტის კურსი, ქვეყნის ეკონომიკის პრობლემები და პრიორიტეტები, საწარმოო ჰაბის პროექტი, სავალუტო ბაზარი, პირდაპირი უცხოური ინვესტიციები და ა.შ.