მთავრობის წევრების შეფასებით, პრეზიდენტს მთავრობის ახალი შემადგენლობა პარლამენტისთვის დროულად უნდა გაეგზავნა. სოზარ სუბარის თქმით, გიორგი მარგველაშვილს ჰქონდა უფლება კანონდმდებლობით განსაზღვრული ვადა სრულად გამოეყენებინა, თუმცა მისი არგუმენტები გაუგებარია. ფინანსთა მინისტრის შეფასებით კი პოლიტიკური გაურკვევლობა ლარის კურსზე ზეგავლენას ახდენს. პრეზიდენტის გადაწყვეტილებას, მთავრობის განახლებული შემადგენლობა პარლამენტს ერთი კვირის შემდეგ წარუდგინოს, დავით უსუფაშვილი გამოეხმაურა. პარლამენტის თავმჯდომარის თქმით, საკანონმდებლო ორგანოს საკითხის გადაწყვეტა დღესვე შეეძლო, მაგრამ კონსტიტუციას და პრეზიდენტის გადაწყვეტილებას პატივი უნდა სცენ. გიორგი მარგველაშვილის გადაწყვეტილების შესახებ კომენტარები მინისტრობის კანდიდატებმაც გააკეთეს. თინა ხიდაშელის თქმით, პრეზიდენტს 7 დღიანი ვადა აქვს და მის გამოყენებაში პრობლემას ვერ ხედავს. გიგლა აგულაშვილი კი მუშაობის უფრო სწრაფად დაწყების სურვილს გამოთქვამს.