ხელნაწერთა ეროვნული ცენტრის ეზოში ხელნაწერთა ეროვნული ცენტრის დასაცავად აქცია გაიმართა.
როგორც ხელნაწერთა ეროვნული ცენტრის ხელმძღვანელები და თანამშრომლები აცხადებენ, ისინი განათლებისა და მეცნიერების მინისტრთან თამარ სანიკიძესთან შესახვედრად მზად არიან.
მათი თქმით, სამი მეცნიერ-თანამშრომლის განათლების მინისტრის კაბინეტში დაბარებაზე ეფექტური თავად თამარ სანიკიძის ხელნაწერთა ეროვნულ ცენტრში მისვლა და ცენტრის თანამშრომელთა სრულ შემადგენლობასთან შეხვედრაა.
როგორც აქციის მონაწილეებმა განაცხადეს, დაპირისპირების ძირითადი მიზეზი, ხელნაწერთა ეროვნული ცენტრის დღევანდელი და სამომავლო ტერიტორიების საკითხები, ლაილაშის ბიბლია, რომლის გადაცემასაც ებრაული კულტურის მუზეუმი ითხოვდა და განათლების სამინისტროს მხრიდან ხელნაწერთა ეროვნულ ცენტრზე სხვადასხვა სახის ზეწოლაა.
ამასთან, ხელნაწერთა ეროვნული ცენტრის დირექტორის მოვალეობის შემსრულებელი ბუბა კუდავა მის ყოფილ თანამდებობაზე, რომელიც ამ დროისთვის ვაკანტურია, განათლების სამინისტროს მიერ გამოცხადებულ კონკურსში მონაწილეობის მიღებას აპირებს.