ეროვნული ვალუტა დღეს ორდღიანი უმნიშვნელო გამყარების შემდეგ ისევ გაუფასურდა. ხვალ ერთი აშშ დოლარი ორი ლარი და ოცდათორმეტი თეთრი ეღირება, ერთი ევროს შეძენა კი ორ ლარად და სამოცდაერთ თეთრად იქნება შესაძლებელი. ეროვნული ვალუტის გაუფასურების პარალელურად კი დღეს პარლამენტში ამ გაუფასურების მიზეზების შემსწავლელი საგამოძიებო კომისიის შექმნაზე მსჯელობდნენ. ამ დროისთვის უცნობია თუ ვინ შევა კომისიის შემადგენლობაში, ასევე უცნობია დაუჭერს თუ არა მხარს პარლამენტის უმრალესობა მსგავსი კომისიის შექმნას. პარლამენტის საფინანსო საბიუჯეტო კომიტეტის თავმჯდომარის თამაზ მეჭიაურის თქმით, თუკი მინისტრების ან ეროვნული ბანკის ბრალეულობა გამოიკვეთება ლარის გაუფასურებაში, მათ შესაძლოა პასუხი აგონ. მეჭიაურის მოადგილის ნოდარ ებანოიძის თქმით კი გადაწყვეტილებას შეიქმნას თუ არა საგამოძიებო კომისია მას შემდეგ მიიღებენ, რაც ეროვნული ბანკის ანგარიშს გაეცნობიან. ერთიანი ნაციონალური მოძრაობის საერთაშორისო მდივნის გიგა ბოკერიას თქმით ლარის გაუფასურება გამოიწვია ბიძინა ივანიშვილის არასწორმა ეკონომიკურმა პოლიტიკამ, რომელმაც ტურიზმის დანგრევა, ბიუროკრატიის ზრდა და გადასახადების გაზრდა განაპირობა. გოკა გაბაშვილის თქმით კი მთავრობისთვის განტევების ვაცს ეროვნული ბანკი წარმოადგენს.