ქობულეთში დამწვარი სასტუმრო „არმაზის“ მფლობელი შერმადინ, იგივე ჰასან ართმელაძე მომხდართან დაკავშირებით პასუხისმგებლობას ბავშვთა ანსამბლ „სიხარული 2“-ის პედაგოგებს აკისრებს. ართმელაძე აცხადებს, რომ პედაგოგები საღამოს ქეიფობდნენ, ნასვამები იყვნენ და ანსამბლის წევრ ბავშვებს სათანადო ყურადღება არ მიაქციეს. ართმელაძის თქმით, თავად სასტუმროს გვერდით შენობაში ცხოვრობს და როდესაც ხანძრისას ადგილზე მივიდა, ბავშვების ოთახის კარი ჩაკეტილი იყო.
თავის მხრივ, მშობლებს ართმალაძესთან პრეტენზიები აქვთ იმასთან დაკავშირებით, რომ სასტუმროში უსაფრთხოების ზომები არ იყო დაცული. წინასწარი ვერსიით, ხანძარი კონდენციონერიდან გაჩნდა.
ხანძარი ქობულეთში, ჰასან ართმელაძის კუთვნილ სასტუმროში გამთენიისას გაჩნდა. სასტუმრო „არმაზში“ რუსთავიდან ჩასული ბავშვთა ცეკვის ანსამბლის წევრები და მათი მშობლები იმყოფებოდნენ. ხანძრის შედეგად, სამი არასრულწლოვანი ბიჭი გარდაიცვალა.
შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 187-ე მუხლის მეოთხე ნაწილით მიმდინარეობს.