ეროვნულ-დემოკრატიული ინსტიტუტის კვლევის თანახმად, გამოკითხულთა 68%-სთვის მისაღებია საქართველოს ევროკავშირთან ასოცირების შეთანხმების ხელმოწერა, 16%-სთვის კი მიუღებელი. რაც შეეხება ჩრდილოატლანტიკურ ალიანსს, NDI-ის მიერ გამოკითხულთა 68%-სთვის მისაღებია საქართველოს მთავრობის გაცხადებული მიზანი, ქვეყანა გახდეს NATO-ს წევრი. კვლევის მიხედვით, გაზრდილია მათი რაოდენობა, ვისთვისაც საქართველოს ევრაზიულ კავშირში გაწევრიანება მისაღებია. ამას გამოკითხულთა 31% ემხრობა, მაშინ, როდესაც 2013 წლის ნოემბერში ეს მაჩვენებელი 11% იყო, 2014 წლის აგვისტოში კი - 20. ევრაზიულ კავშირში გაწევრიანება მიუღებელია 41%-ისთვის, გამოკთხულთა 27%-ს კი პასუხი არ აქვს. ბოლო გამოკითხვის თანახმად, 26-% მიიჩნევს, რომ საქართველო მეტ სარგებელს მიიღებს, თუ რუსეთთან უკეთესი ურთიერთობების ჩამოყალიბების სანაცვლოდ უარს იტყვის ევროატლანტიკურ ინტეგრაციაზე. NDI-ის კვლევის მონაცემებით, მოსახლეობის 44% ფიქრობს, რომ რუსეთი საქართველოსთვის რეალურ საფრთხეს წარმოადგენს, 34%-ის აზრით ეს საფრთხე გაზვიადებულია, 16% კი მიიჩნევს, რომ რუსეთი საქართველოსთვის არანაირ საფრთხეს არ წამოადგენს. გამოკითხულთა 50% ეთანხმება მოსაზრებას, რომ რუსეთს გარკვეული გავლენა აქვს საქართველოზე, მათი 86%-ის აზრით კი ეს გავლენა უარყოფითია. კვლევის მონაწილეთა 50% მიიჩნევს, რომ მომავალი 2 წლის განმავლობაში რუსეთის გავლენის გაზრდა მოსალოდნელია.