საქართველოში ოლიმპიური ცეცხლი პირველად ჩამოვიდა. ოლიმპიური თამაშების მთავარი სიმბოლო ახალგაზრდული ოლიმპიური ფესტივალის დელეგაციამ საბერძნეთიდან ბათუმის საერთაშორისო აეროპორტში რამდენიმე წუთის წინ ჩამოიტანა.
ოლიმპიური ცეცხლის საზეიმო დახვედრას ჟურნალისტები, პოლიტიკოსები და ოლიმპიური კომიტეტის წარმომადგენლები ესწრებიან.

ცეცხლის მასშტაბური ესტაფეტა სწორედ აეროპორტიდან დაიწყო, აეროპორტიდან ოლიმპიური ცეცხლის გამოტანის შემდეგ პირველი მეჩირაღდნე იქნება სპორტულ ტანვარჯიშში მსოფლიო ჩემპიონი რუსუდან სიხარულიძე. 22 წარმატებული სპორტსმენი ცეცხლს პიაცას მოედანზე მიიტანს. ბოლო მეჩირაღდნე, რომელიც ცეცხლს მოედანზე შეიტანს, ვეტერანი ფეხბურთელი რევაზ ჩელებაძეა.

მანამდე კი ცეცხლის ანთების საზეიმო ღონისძიება ათენში, პანათენაიკოსის სტადიონზე სპეციალური რიტუალის თანხლებით ჩატარდა.
ტრადიციული ღონისძიება ჰერას ტაძრის ქურუმებმა წარადგინეს.
ხვალდან კი ჩირაღდანი სამხრეთიდან აღმოსავლეთის მიმართულებით გადაინაცვლებს და ორი თვის განმავლობაში საქართველოს 67 მუნიციპალიტეტს შემოივლის.
ოლიმპიურ ცეცხლს საქართველოში სულ 700 მეჩირაღდნე შემოატარებს.
ევროპის ახალგაზრდული ოლიმპიადა თბილისში 26 ივლისიდან პირველ აგვისტომდე გაიმართება. მასში 49 ქვეყნის 3800 სპორტსმენი იღებს მონაწილეობას.
ოლიმპიადის თბილისში ჩატარების საკითხი 2010 წელს ბელგრადში გამართულ ევროპის ოლიმპიური კომიტეტების რიგით 39-ე გენერალური ასამბლეაზე გადაწყდა, როცა ორ კანდიდატ ქალაქს, თბილისსა და ბრნოს (ჩეხეთი) არჩევანი თბილისის სასარგებლოდ დასრულდა.