25 წლის ლაშა მახარაძის ოჯახი მკვლელობაში ბრალდებული გიორგი ოქროპირიძის, იგივე „ოქრიკას“ წინასწარი პატიმრობიდან შესაძლო გათავისუფლებას აპროტესტებს და სამართლიანობის აღდგენას საკუთარი ძალებით აპირებს.

მოკლულის ახლობლები პროკურატურას მოუწოდებენ, გიორგი ოქროპირიძე წინასწარი პატიმრობის ვადის ამოწურვის შემდეგ, კვლავ პატიმრობაში დატოვონ, რადგან მიაჩნიათ, რომ ბრალდებული შურისძიების მიზნით, კიდევ არაერთ დანაშაულს ჩაიდენს. ამის შესახებ მათ „ტელეიმედთან“ საუბრისას აღნიშნეს.

მოკლული ლაშა მახარაძის დედა ნინო დიდებულიძე აპირებს, ამ მოთხოვნით პრემიერსა და პრეზიდენტს მიმართოს.

„თუ ეს სახელმწიფოა და სურთ რაიმე, იოტის ოდენა ავტორიტეტი მაინც შეინაჩუნონ, ყველა ძალა უნდა იხმარონ, რომ ოქროპირიძე სასჯელაღსრულების დაწესებულებიდან არ გამოუშვან, ის აუცილებლად ჩაიდენს იგივეს. იმიტომ, რომ გამწარებულია ძალიან ბევრ ადამიანზე, რომლებიც არ მალავდნენ მის დანაშაულს. სასამართლო დარბაზშივე ანიშნებდა ის მოწმეებს, ვის გაუხვრეტდა შუბლს და ეს იქნება სახელმწიფოს კისერზე“, - აცხადებს ნინო დიდებულიძე.

ლაშა მახარაძის ოჯახის ახლობლებისთვის გაუგებარია, რატომ ვერ გამოიტანეს ნაფიცმა მსაჯულებმა.

მახარაძეების ახლობელი ზაალ ჟვანია აცხადებს, რომ დაელოდება, რა მოხდება სასამართლოზე, შემდეგ კი შურსძიებას დაიწყებს.

„როგორც სხვა წინა საქმეებით დაზარალებული, თვითონ დავიწყებ სამართლიანობის აღდგენას და შურს ვიძიებ. ამ იდიოტების პარპაშს როდემდე ვუყურო?“- ამბობს იგი.
ლაშა მახარაძის მკვლელობის საქმეზე ნაფიცმა მსაჯულებმა 13-საათიანი მსჯელობის შემდეგ ვერდიქტი ვერ გამოიტანეს. გამამტყუნებელი ან გამამართლებელი ვერდიქტის მისაღებად ნაფიც მსაჯულთა 12-კაციანი შემადგენლობიდან 8 ხმა იყო საჭირო. ამის შემდეგ მოსამართლემ ნაფიცი მსაჯულების ახალი შემადგენლობის ასარჩევად სხდომა 10 ივნისს 12:00 საათზე ჩანიშნა.
როგორც პროკურორმა ნიკოლოზ ნინიძემ განაცხადა, გიორგი ოქროპირიძეს პატიმრობის 9-თვიანი ვადა 11 ივნისს ეწურება და შესაბამისად, ამ ვადის გასვლის შემდეგ საპატიმრო შესაძლოა დატოვოს.