ამერიკის დროშით და სვანური ქუდით ცნობილი ომარ მაღლაქველიძე (ბაბუ) იმ ტერიტორიაზე იმყოფებოდა, სადაც თბილისის ზოოპარკიდან გაქცეული თეთრი ვეფხვი შენიშნეს.
შესაბამისი სამსახურის წარმომადგენლებმა მტაცებლის ლიკვიდირება შეძლეს, თუმცა მაღლაქველიძეს ვეფხვის დაჭერის საკუთარი ვერსია ჰქონდა.
როგორც მან განაცხადა, სტიქიის შემდეგ ზოოპარკიდან გაქცეული ცხოველების დასაჭერად მან საკუთარი ხედვა ზოოპარკის ტერიტორიაზე მომუშავე ადამიანებს, მათ შორის, შესაბამისი სამსახურის თანამშრომლებს გააცნო, თუმცა არ დაუჯერეს.
მისი თქმით, მტაცებლების დასაჭერად სტიქიის ზონაში „ერთი ირმის დაბმა იყო საჭირო“.
„ზოოპარკიდან გაქცეული ცხოველები სადღაც რომ იყვნენ, ვიცოდი, ამიტომ ვამბობდი, ერთი ირემი დააბით სადმე და ცხოველები მასთან მივლენო. ყველას ვუთხარი, მაგრამ არ დამიჯერეს და დამცინოდნენ. მე სერიოზულად ვამბობდი, იმათმა კი, ხუმრობად ჩათვალეს“, - განაცხადა ომარ მაღლაქველიძემ.
„ლაგუნა ვერეს“ ტერიტორიაზე, რომელიც სტიქიის ზონაში მდებარეობს, დღეს თეთრი ვეფხვი გამოჩნდა. მტაცებელმა ყოფილი მაუდის ქარხნის ტერიტორიაზე ერთი ადამიანის სიცოცხლე იმსხვერპლა. იგი ადგილზევე გარდაიცვალა.
შესაბამისი სამსახურის თანამშრომლებმა მტაცებლის ლიკვიდირება მოახერხეს.
#წყალდიდობა