,თავისუფალი დემოკრატების" განცხადება

როგორც მოგეხსენებათ, რუსეთის საოკუპაციო ძალებმა 10 ივლისს გორის რაიონის სოფელ წითელუბნის და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, თბილისი–გორის ცენტრალური ავტომაგისტრალის სიახლოვეს, ე.წ. ,,საზღვრის’’ აღმნიშვნელი ბანერები აღმართეს. აღნიშნული სოფლის სიახლოვეს მდებარეობს ბაქოს–სუფსას მილსადენის გარკვეული მონაკვეთები, განხორციელებული ქმედებების შედეგად კი, სოფელ ორჭოსანის მიმდებარე ტერიტორიაზე. ნავთობსადენის გარკვეული ნაწილი ოკუპირებულ ტერიტორიაზე მოექცა.
რუსეთის ფედერაციის ქმედება კონფლიქტის რეგიონში არის საერთაშორისო სამართლის ფუნდამენტური პრინციპების კიდევ ერთი უხეში დარღვევა, მიმართულია რეგიონში სიტუაციის გასამწვავებლად და უკვე მერამდენედ ქმნის დაძაბულ ვითარებას აბაშიძე–კარასინის მორიგი შეხვედრის წინ, რომელიც 15 ივლისს უნდა გაიმართოს პრაღაში.
ამგვარი ნაბიჯები ხელს უწყობს ვითარების მხოლოდ გამწვავებასა და არსებული ჰუმანიტარული მდგომარეობის გაუარესებას ადგილზე, რაც საფრთხეს უქმნის მთლიანად რეგიონულ უსაფრთხოებას.
ჩვენ, თავისუფალი დემოკრატები, მოვუწოდებთ საქართველოს ხელისუფლებას, დროულად აამოქმედოს ყველა საერთაშორისო ბერკეტი, გამოიყენოს ყველა ორმხრივი და მრავალმხრივი ფორმატი შესაბამისი მძაფრი რეაქციის დროულად გამოხატვისთვის.
ჯერჯერობით, არცერთი საერთაშორისო ორგანიზაციის ან ცალკეული ქვეყნის მიერ არ გაკეთებულა შესაბამისი განცხადება, რაც მიუთითებს საქართველოს ხელისუფლების არასათანადო მუშაობაზე. ამისათვის საჭიროა უმაღლეს დონეზე, დაუყოვნებლივი, პირდაპირი კომუნიკაცია მსოფლიოს ლიდერებთან და საერთაშორისო ორგანიზაციების ხელმძღვანელებთან, რათა მოხდეს რუსეთის ამ კონკრეტული ქმედებების მკაცრი დაგმობა და შესაძლო სამომავლო პროვოკაციების პრევენცია, ასევე მჭიდროდ ითანამშრომლოს ევროკავშირის სადამკვირვებლო მისიასთან, რომელსაც ჯერჯერობით არ გაუკეთებია ვითარების შეფასება.
გარდა ამისა, საქართველოს ხელისუფლებას მოვუწოდებთ, გადახედოს აბაშიძე–კარასინის მოლაპარაკებათა ფორმატს და იმსჯელოს მისი სამომავლო გაგრძელების მიზანშეწონილობის თაობაზე.

–
ვრცლად: http://www.fd.ge/index.php?article_id=297&clang=0