სისხლის სამართლის საერთაშორისო სასამართლოს პროკურორი ფატუ ბენსუდა თბილისშია. სისხლის სამართლის საერთაშორისო სასამართლოს პროკურორმა რამდენიმე დღის წინ სასამართლოს წინასწარი წარმოების პირველ პალატას მიმართა და საქართველოში, 2008 წლის აგვისტოს შეიარაღებული კონფლიქტის დროს სავარაუდოდ ჩადენილი სამხედრო და კაცობრიობის წინააღმდეგ მიმართული დანაშაულების გამოსაძიებლად ნებართვა სთხოვა. გამოძიება 2008 წლის 1 ივლისიდან 10 ოქტომბრის ჩათვლით პერიოდს მოიცავს.
ამ საქმეზე წინასწარი გამოძიება პროკურორის ოფისმა ჯერ კიდევ 2008 წელს დაიწყო. იუსტიციის მინისტრი თეა წულუკიანი 2013 წლის აპრილში ამბობდა, რომ ამ საქმეს ქართული მხარე გამოიძიებდა.
დღეს კი ქალბატონი მინისტრი ჰააგაში პროცესის დაძვრას ესალმება და ამბობს, რომ საქართველოს მხარის გამოძიება სრულყოფილი ვერ იქნებოდა, რადგან ჩვენს გამომძიებლებს ოკუპირებულ ტერიტორიებზე არ უშვებდნენ.