27-28 ოქტომბერს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე სამუშაო ვიზიტით სერბეთის რესპუბლიკაში, ქ.ბელგრადში იმყოფებოდა, სადაც შეხვედრები გამართა სერბეთის საგარეო საქმეთა სამინისტროს სახელმწიფო მდივანთან როკსანდა ნინჩიჩთან, ევროპული ინტეგრაციის უპორტფელო მინისტრთან იადრაკა იოკსიმოვიჩთან, ევროკავშირთან სერბეთის მთავრობის მთავარ მომლაპარაკებელთან ტანია მიშჩევიჩთან და ეროვნული ასამბლეის საგარეო ურთიერთობათა კომიტეტის თავმჯდომარესთან ალექსანდრა ჯუროვიჩთან.
სერბეთის აღმასრულებელი და საკანონმდებლო ხელისუფლების წარმომადგენლებმა მადლობა გადაუხადეს ქართულ მხარეს სერბეთის ტერიტორიული მთლიანობისა და სუვერენიტეტის მხარდაჭერისა და კოსოვოსთან დაკავშირებით არაღიარების პოლიტიკის გატარებისთვის. სახელმწიფო მდივანმა, ასევე, ხაზი გაუსვა სერბეთის მხარიდან საქართველოს ტერიტორიული მთლიანობისა და სუვერენიტეტის მხარდაჭერას.
შეხვედრებზე საქართველოს ევროკავშირში ინტეგრაციის პროცესის, ასოცირების შესახებ შეთანხმების განხორციელების მიმდინარეობის, ევროკავშირთან სავიზო რეჟიმის ლიბერალიზაციის სამოქმედო გეგმის შესრულებისა და სერბეთის, როგორც ევროკავშირის წევრობის კანდიდატის, გამოცდილების გაზიარების საკითხებზე იმსჯელეს.
განსაკუთრებული ყურადღება დაეთმო სერბეთსა და საქართველოში ევროკავშირის ფინანსური მხარდაჭერით უკვე განხორციელებული და მიმდინარე პროექტების შესახებ საზოგადოების ინფორმირებულობის ამაღლების მიზნით სტრატეგიული კომუნიკაციის აუცილებლობას.
მხარეებმა, ასევე, ყურადღება გაამახვილეს ევროინტეგრაციის პროცესში არასამთავრობო ორგანიზაციებთან თანამშრომლობისა და ჩართულობის მნიშვნელობაზე. დავით ბარაძემ ისაუბრა ამ კუთხით სახელმწიფო მინისტრის აპარატის მიერ განხორციელებულ საქმიანობასა და თანამშრომლობის კონკრეტულ შედეგებზე.