"ზვიად ქორიძეს თუ აქვს უფლება, ადამიანები შეიწყალოს, პატრიარქს უფლება უნდა ჰქონდეს, შეწყალების პროცესში ჩაერთოს" - მიიჩნევს საპარლამენტო უმრავლესობის წევრი ლუკა კურტანიძე. კურტანიძის მსგავსად, პატიმართა შეწყალების პროცესში პატრიარქის როლის ზრდაზე ბევრი უცნაური განცხადება მოვისმინეთ ბოლო დღეების მანძილზე. კათალიკოზი ამ ინიციატივით შაბათს, რუსთაველის თეატრში გამოვიდა. ამავე დღეს, საქართველოს პრემიერმინისტრმა სპეციალური განცხადება გაავრცელა, სადაც პარლამენტსა და პრეზიდენტს ამ საკითხზე მსჯელობის დაწყებისკენ მოუწოდა. მოგვიანებით კი საპატრიარქომ გაავრცელა განცხადება, სადაც აღნიშნულია, რომ პატრიარქის განცხადება, პატიმრების შეწყალების უფლების მისთვის გადაცემასთან დაკავშირებით, საკანონმდებლო ინიციატივა არ ყოფილა.