- გადადგება თუ არა საქართველოს პრემიერმინისტრი, სავარაუდოდ, დღეს გახდება ცნობილი. საგანგებო ბრიფინგი მთავრობის კანცელარიაში თავდაპირველად 18 საათზე იყო ჩანიშნული, თუმცა საღამოს 8 საათისთვის გადაიდო.
მთავრობის ადმინისტრაცია არ აკონკრეტებს, რა თემასთან დაკავშირებით მართავს ირაკლი ღარიბაშვილი საგანგებო ბრიფინგს. თუმცა დღეს დილიდან ვრცელდება ინფორმაცია იმის შესახებ, რომ პრემიერმინისტრი გადადგომას აპირებს. მედიაში გავრცელებული ცნობითვე, ირაკლი ღარიბაშვილს საგარეო საქმეთა მინისტრი გიორგი კვირიკაშვილი შეცვლის.
- საქართველოს პრემიერმინისტრის შესაძლო გადადგომას საგანგებო ბრიფინგით გამოეხმაურა ერთიანი ნაციონალური მოძრაობა. პარტიის საგარეო ურთიერთობათა მდივნის გიგა ბოკერიას შეფასებით, იმ მძიმე ეკონომიკური ვითარების ფონზე, რაც ქვეყანაშია მთავრობის მეთაურის გადადგომა სწორია, თუმცა ის ქვეყანაში არსებულ ვითარებას ვერ შეცვლის. ნაციონალურ მოძრაობაში ამბობენ, რომ ქვეყანაში რეალურ გადაწყვეტილებებს კვლავ ბიძინა ივანიშვილი იღებს, ამის შეცვლა კი დემოკრატიული არჩევნების გზით არის შესაძლებელი.
- საკრებულოს დეპუტატი ალეკო ელისაშვილი შეწყალების კომისიის გარშემო მიმდინარე მოვლენებთან დაკავშრებით პარლამენტში საგამოძიებო კომისიის შექმნას ითხოვს. უმრავლესობის დეპუტატთა ნაწილი პროცესში საკანონმდებლო ორგანოს ჩართვის აუცილებლობას ვერ ხედავენ. საგამოძიებოს კომისიის შემქნის იდეა მისაღებია ოპოზიციისთვის. დღესვე ამ საკითხთან დაკავშრებით მორიგი კომენტარი გააკეთა ეკა ბესელიამ. ადამიანის უფლებათა კომიტეტის თავმჯდომარე ელისაშვილს კიდევ ერთხელ ადანაშაულებს სიცრუეში და ამბობს, რომ ის კონკრეტული პოლიტიკური ძალების ინტერესებს ემსახურება.