ათასწლეულის გამოწვევის ფონდი - საქართველოსა და მასწავლებელთა პროფესიული განვითარების ეროვნული ცენტრის ერთობლივი პროექტის განხორციელებაში საერთაშორისო საკონსულტაციო კომპანია IREX ერთვება, რომელიც პროექტს ტექნიკურ დახმარებას გაუწევს.

მასწავლებელთა და სკოლის დირექტორთა პროფესიული განვითარების პროექტის კონსულტირების კომპონენტის პრეზენტაცია დღეს სასტუმრო თბილისი მარიოტში გაიმართა. ღონისძიებას განათლებისა და მეცნიერების მინისტრის მოადგილეები ლია გიგაური და გიორგი შარვაშიძე ესწრებოდნენ. IREX-ის კონსულტანტები პროექტის წარმომადგენლებთან ერთად სატრენინგო მოდულების შემუშავებასა და სხვა ტექნიკურ საკითხებზე პროექტის დასრულებამდე იმუშავებენ.

მასწავლებელთა და სკოლის დირექტორთა პროექტი მიმდინარე წელს ამოქმედდა. პროექტის ფარგლებში, სამი წლის განმავლობაში STEM-ის მიმართულების 20 000-ზე მეტი მასწავლებლისა და ყველა საჯარო სკოლის დირექტორის უწყვეტი პროფესიული განვითარება იგეგმება. პროექტი ათასწლეულის გამოწვევის კორპორაციის მეორე კომპაქტის ერთ-ერთი კომპონენტია და მისი განხორციელებისთვის 14 მილიონი დოლარია გამოყოფილი.