რუსთავის მერიის სპეციალური კომისია სტიქიის შედეგად მიყენებული ზარალის შესწავლას დილიდან შეუდგა. მერიის ააიპ "უზრუნველყოფის" სამსახურის თანამშრომლები ამ დრომდე აწარმოებენ ქარისგან მოგლეჯილი და დამტვრეული ხეებისგან ეზოებისა და გზების გაწმენდით სამუშაოებს.
სტიქიამ რუსთავში საცხოვრებელი სახლების სახურავები, ელექტროგადამცემი და გარეგანათების ხაზები დააზიანა. ძლიერმა ქარმა ქალაქის რამდენიმე უბანში ხეები მოგლიჯა და სახურავები გადახადა, 21-ე მიკრორაიონში მოგლეჯილი ხე ორ ავტომანქანას დაეცა და დააზიანა.
რუსთავის მერიის ცხელ ხაზზე სტიქიისგან მიყენებულ ზიანზე ამ დროისათვის 50-ზე მეტი შეტყობინებაა შესული. მოგლეჯილი ხეებისგან გზების გაწმენდის პროცესი მთელი ღამითაც მიმდინარეობდა.
წუხელ ღამით, რუსთავის მოსახლეობის 30%-ზე მეტს ელექტროენერგიის მიწოდება რამდენიმე საათით შეუწყდა. ამ დროისათვის ქარის სიმძლავრემ იკლო, თუმცა რუსთავში ისევ ძლიერი ქარი ქრის.