აღდგომის დღესასწაულთან დაკავშირებით დედაქალაქში მუნიციპალური ტრანსპორტი სპეციალური რეჟიმით გადაადგილდება

აღდგომის დღესასწაულთან დაკავშირებით, დედაქალაქში მუნიციპალური ტრანსპორტი სპეციალური რეჟიმით გადაადგილდება.

მერიის ინფორმაციით, დღეს და ხვალ ავტობუსები დილის 8 საათიდან საღამოს 8 საათამდე თბილისის სასაფლაოების მიმართულებით მგზავრებს უფასოდ მოემსახურებიან.

დედაქალაქის მერია ავტობუსების გასვლის მარშრუტსაც ავრცელებს. მუნიციპალური ტრანსპორტი მუხათგვერდისა და ვაშლიჯვრის სასაფლაოების მიმართულებით მეტრო „დიდუბიდან“ გავა.

კუკია-მახათასკენ მგზავრებს წასვლა სადგურისა და მარჯანიშვილის მოედნებიდან შეეძლებათ. საბურთალოს სასაფლაოზე - მეტრო „დელისიდან“, თბილისის ზღვის სასაფლაოზე - მეტრო „სარაჯიშვილიდან“, ვერის სასაფლაოსკენ მიმავალი ავტობუსი კი დოდო ჭიჭინაძის 25 ნომერში გაჩერდება.