სამხრეთ აფრიკაში გრძელდება ცნობილი პარაოლიმპიელის ოსკარ პისტორიუსის გახმაურებული პროცესი, რომელსაც საცოლის მკვლელობაში ედება ბრალი. დღეს მიმდინარე პროცესზე პისტორიუსს ბოლო შანსი მიეცა სასჯელი შეემსუბუქებინა. თუ მან სასამართლოს დარწმუნება ვერ შეძლო, ციხეში 15 წლის გატარება მოუწევს.

სამხრეთ აფრიკელი მოდელი და მსახიობი რივა სტინკამპი ცნობილმა პარაოლიმპიელმა მორბენალმა, ოსკარ პისტორიუსმა 2013 წლის 14 თებერვალს მოკლა. დაახლოებით ღამის 4 საათზე პისტორიუსის სახლში, რივა იარაღიდან რამდენჯერმე ნასროლმა ტყვიამ იმსხვერპლა. ხმები იმის შესახებ, რომ პისტორიუსს იგი მძარცველში აერია, პოლიციამ არ დაადასტურა. სამართალდამცავების თქმით, მკვლელობის ადგილზე რივას და ოსკარის გარდა არავინ იმყოფებოდა.

დღევანდელ პროცესზე ადვოკატის მოთხოვნით, პარაოლიმპიელ სპორტსმენს მიმართეს, ეჩვენებინა თუ რა მდგომარეობაში იმყოფებოდა დანაშაულის ჩადენის მომენტში. მან ორივე ფეხიდან მოიხსნა პროთეზი და სასამართლო დარბაზში ამპუტირებული ფეხებით გაიარა, რათა ეჩვენებინა, რომ შემთხვევის ღამეს ახალგაღვიძებულმა უპროთეზო ფეხებით რამდენიმე მეტრი გაიარა, სანამ საბედისწერო გასროლას განახორციელებდა.

ადვოკატს ამით სურდა ეჩვენებინა, რომ იარაღის გარეშე პისტორიუსი სრულიად დაუცველი იქნებოდა და ამან განაპირობა მისი ნაჩქარევი რეაქცია, რამაც რივა სტინკამპი იმსხვერპლა. ასევე მისი ადვოკატი მოითხოვს საქმიდან ამოიღონ ქალზე ძალადობის მუხლი, რადგან ეს უბედური შემთხვევა იყო და არა გამიზნული ძალადობის აქტი. თავად სპორტსმენი მკვლელობის ღამის აღწერის დროს განუწყვეტლივ ტიროდა. მასთან ერთად ტიროდა დარბაზში შეკრებილი ხალხის უმრავლესობაც.